|
قهرمان آذربایجان تورک اولوسو! آزادلیق سئور اینسانلار!
ایللر اؤنجه باشلایان گونئی آذربایجان میللی قورتولوش حرکاتیمیز گونو گوندن گلیشمکدهدیر. میللی حرکتیمیز کولتورل، توپلومسال و سیاسال آلانلاردا هیزلا ایرلیلمکده و بو آلانلارین دنگهلرین ائتگیلهیرک، اؤز ایستگی کیمی دییشمکدهدیر.
گؤنئی آذربایجان تورکلویونون اولوسال بیلینجینین نه درجهده یوکسک اولماسی، 1385- جی ایلین خورداد (مای 2006) میللی قیاملاریندا دوست و دوشمانا آیدینجا بللی اولدو. ایندی ایسه میللی قیاملارین 4-جو ایل دؤنومو اولوسوموزون میللی بیلینجینین داها درین وگئنیشلنمهسیندن دولایی، میللی موباریزلریمیز گون به گون جسارتلی و قورخماز حرکتلرله، میللی حاقلاریمیزین اوغروندا اولان میللی موجادیلهمیزی گونجل و بویوتلو بیر سویّهده قاباغا آپارماقدادیرلار.
سون گونلرده بیر چوخ شهرلریمیزده ایران شوونیست رژیمینین الی ایله میللتچی آکتیویستلریمیزین چوخ سایدا گؤز آلتینا آلینماسینین شاهیدی اولموشوق. آیدین خواجهای (تبریز)، احمد آقایی (همدان)، استاد اکبر آزاد (تهران)، بهبود قلیزاده (قوشاچای)، بهمن نصیرزاده (ماکو)، پینار فرجزاده (اورمو)، حسین نصیری (تبریز)، حیدر کریمی (خوی)، دکتر لطیف حسنی (کرج)، دکتر علیرضا عبدالهی (اورمو)، مهندس شهرام رادمهر (خیاو)، مهندس محمود فضلی (خوی) و یوروش مهرعلیبیگلو(صوفیان) و...، آذربایجان میللی حرکتینین تانینمیش اؤنجوللریندن اولاراق، توتوقلانمیش وایندیلیکده تبریزین ایططیلاعات دوستاغیندا آغیر تضییقلر و ایشکنجهلره معروض قالماقلاری بیر حالدادیر کی سعید متین پور (زنجان) ایران رژیمینین اوین حبسخاناسیندا ساغلیق باخیمیندان آغیر دورومدا اولدوغو بیلدیریلیر.
بو آرادا، میللی حرکتچیلریمیزین توتوقلانما و میللی حرکتیمیزه تضییقلرین آرتماسی زامانی، یاخلاشیق بیر ایل اؤنجهدن تهران و بیر سیرا فارس شهرلرینده، ایران پرزیدنت سئچگیسی آردیندان باشلایان یاشیل حرکت اولایلارینین ایل دؤنومو ایله اوست-اوسته دوشدوگونه رغمن، یاشیل حرکته منسوب اولان شخص، قوروپ، پارتییالار و حتا اینسان حاقلاری آدینا چالیشان درنکلر و قوروملار، گونئی آذربایجاندا اولان گئنیش توتوقلامالار و تضییقلری گؤرمزدن گلمهلری، اونلارین ماهیتینی بیر داها سرگیلمکدهدیر.
بیز گونئی آذربایجان تشکیلاتلار و قوروملاری سون گونلرده میللی موباریزلرین علیهینه گئدن بو تضییقاتی، باخمایاراق کی، اونلارین چوخو میللی حرکتیمیزین بیر تشکیلاتینا منسوب دورلار، اساسا میللی حرکتیمیزه عمومی بیر باسقی و سالدیری کیمی دیرلندیریر و اونو قیناییب، کسینلیکله محکوم ائدریک.
بؤیوک اولوسوموز و ها بئله دونیا ایجتیماعیتی اؤنونده بیر داها میللی حرکتیمیزین سیویل و مدنی بیر حرکت اولدوغونو وورغولاییب، دونیا قامو اویو، بشر حاقلاری اوغروندا چالیشان قورولوش و اؤرگوتلرینی بو آغیر تضییقلره، تپکی گؤسترمگه و محبوسلاریمیزین آزادلیغا بوراخیلماسی اوغروندا جیددی چابالارینی گؤزلهییریک.
یاشاسین آزادلیق! یاشاسین آذربایجان!
2010-06-10
آذربایجان اؤیرنجی حرکاتی (AZOH)
آذربایجان فئدراسیاسی ایسوئچ (AFİ )
دونیا آذربایجانلیلارینین حاقلارینی مودافيعه کومیتهسی
گونئی آذربایجان دموکرات پارتیاسی (GADP)
گونئی آذربایجان دیپلوماتیک کومسیونو
گونئی آذربایجان قورتولوش پارتیاسی (قورتولوش)
گونئی آذربایجان میللی اویانیش حرکاتی (GAMOH)
|
)
