Zəlimxan Məmmədli: "Bu, qeyri-farsların milli haqlarının
təmin olunmasına gətirib çıxaracaq"

"GAMOH lideri Mahmud Çöhrəqanlının "İran federallaşacaq" fikirlərinin arxasında bir fundament var. Bu prosesdə həm ABŞ-ın İrana qarşı apardığı siyasət, həm də İran daxilində zaman-zaman kürdlərin, bəluğların, ərəblərin və ən əsası, Azərbaycan türklərinin milli oyanış hərəkatı da mühüm rol oynaya bilər". Bu haqda KXCP Ali Məclisinin sədri Zəlimxan Məmmədli açıqlama verib. O, bildirib ki, Güney Azərbaycanda milli oyanış artıq milli azadlıq xarakteri alıb və bu proses hər gün davam edir: "Bu gün Azərbaycan türkü öz istiqlal şüarını, öz milli kimliyini dilə gətirə, öz haqqını tələb edə bilir. Bütün bunlar onu göstərir ki, onlar ən yaxın zamanda yaranacaq federativ dövlətin aparıcı subyektlərindən bir olmağa iddialıdırlar" deyən Z.Məmmədli qeyd edib ki, Güney Azərbaycan təşkilatlarının digər etnik azlıqlarla əlaqələri kifayət qədər güclüdür və onların hər birinin vahid mövqeyi var: "İran rejimi qeyri-fars millətlərini istismar etməklə məşğuldur və hazırda ölkədə onun ən azından liberallaşması və milli-mədəni muxtariyyətdən tutmuş Azərbaycan türklərinin istiqlalına qədər şüarlar səslənməkdədir. Bu və bu kimi digər məsələlərdə qruplar öz aralarında artıq razılaşıblar". İranın islahat, yoxsa inqilab yolu ilə federallaşması məsələsinə gəldikdə isə Z.Məmmədli bunları deyib: "İranın federallaşmasında yuxarıdan islahat məsələsi kifayət qədər çətin görünür. Ən azından ona görə ki, hakimiyyətdə teokratik rejim hökm sürür. Onun islam təməllərinə söykənməsi özü də mahiyyətini itirir. Ən azı ona görə ki, kifayət qədər radikal şüarlarla çıxış edən islam rejimi İsrailin Qəzzaya hücumunda susmağa üstünlük verdi. Mən düşünürəm ki, proses aşağıdan inqilab yolu ilə həyata keçiriləcək. Bu isə son nəticədə İran rejiminin çökməsinə və liberallaşmasına və milli azlıqların halal haqlarının təmin olunmasına gətirib çıxaracaq". ("OLAYLAR"İA)