بیر نئچه آیدان سونرا ، ایران اسلام جمهوریتی نین 10 جی  جمهور باشقانلیغی سئچگی لری اولاجاق. شوونیست و توتالیتر رژیم ده ، سئچگلیر آزاد، دمکراتیک و مشروع اولماسا دا ، سئچگی زامانی یارانان فضادان ایستیفاده ائتمک چوخلارین دوشوندورور.

بوندان اؤنجه کی سئچگی لرده "شورای نگهبان" دئییلن اورقانین سوزگجیندن یالنیز اؤز آداملاری کئچمیشدیر.بونا باخمایاراق سئچگی زامانی ، سیاسی ادبیات و سؤیلمین آز دا اولسا دئییشیکلییی گؤرونموشدور.البته سیاسی قورولوشدا دئییشیکلیک هئچ زامان مومکون اولمامیشدیر.

گونئی آذربایجان میللی حرکتی ، چوخونلوقدا ایندییه قدر پرزیدنت سئچگی لرین بایکوت ائتمیشدیر. البته حرکتیمیزده بیر سیرالاری ، سئچگی زامانی ایستکلریمیزی گوندمه گتیرمک اوچون ، آدایلارا یاخینلاشمیش و اؤز ایستکلریمیزی اونلارا چاتدیرمیشلار. اؤرنه یی اؤتن سئچگی لرده "مهرعلیزاده" آدلی بیر آدای 28 ماده ده یازیلمیش ایستکلره قول چکمیشدیر. مهرعلیزاده نین آذربایجاندا بیرینجی سس گتیرمه سینی ، بیر سیرا دوستلاریمیز همین 28 ماده نی قبول ائتمه سینه باغلاییرلار. اونلارین باخیشینجا ، حرکتیمیز او اولایدان عمومیتله قازانجلی چیخمیشدیر. بو سؤزون دوغرو اولوب اولماماسی بیر یانا، قارشیمیزداکی سئچگیلره همین باخیشلا قاتیلماق ایسته ینلر وار . البته ، بو دؤنه "مهرعلیزاده" یوخ، "اکبر اعلمی" سؤز قونوسودور. یازینین باشلیغیندا گؤروندویو کیمی "اکبر اعلمی" و قارشیداکی سئچگی لر حاقدا ، دوشونجه لریمی دیرلی میللتچی لره سوناجام.

اؤنجه بو دؤنه کی سئچگی لرده بیر سیرا میللتچی یولداشلاریمیزین دوشوندوکلرین اؤزتله یک. ( البته بونلاردان فرقلی دوشونن باشقا یولداشلاریمیز دا وار، بونلارین پیلانلارین دا "اعلمی"نین یئر آلدیغی اوچون یازیلیر) :

-         سئچگی فضاسیندان ایستیفاده ائدرک ، حرکتی دورقونلوقدان چیخارماق.

-         میللی ایستکلریمیزی گئنیش تریبونلاردان یایماق.

-         اؤلکه ده حاکمیت ایچینده ، حرکتین ایستکلرین بیر مسئله کیمی ایرلی سورمک.

-         موختلیف شخص و جریانلاری بیر آرایا گتیره رک ، حرکت ده بیرلیک اوچون بیر آددیم آتماق.

-         و....

بو یولداشلار ، بو ایستکلره و بلکه ده بونلاردان داها آرتیق ایستکلره چاتماق اوچون ، سئچگی لره قاتیلماغی دوشونموشلر. اونلارین باخیشینا گؤره ، سئچگی آدایلاریندان بیزه ان اویغونو و ان یاخینی "اکبر اعلمی" ایدی. قالانلاری هامیسی شوونیست وسیستمه باغلی دیلار. اعلمی ایله دانیشیب اوندان حمایت ائتمک لازیمدیر.

اعلمی نی ترجیح ائتمکده ایسه ، اونون 8 ایل تبریز نماینده سی اولدوغو زامان ، مجلس ده چالیشمالاری و چئشیدلی چیخیشلاری هابئله اونون جسارتی و سؤزو اوسته دوران بیری اولدوغونو وورقولاییردیلار. خرداد حادثه سینده مجلس ده دانیشماسی ، بابک قالاسینا گئتمه سی ، بیر سیرا توتوقلانان یولداشلاردان حمایت ائتمه سی ..... اونلارین ایرلی سوردویو دلیل لردن ایدی. ( البته بو یولداشلار اعلمی نی اؤزوموزدن و میللت چی سانمیردیلار، ساده جه دئییردیلر بیزیم دردیمیزه ده یر.)

بو دوستلاریمیز ،سونرالار ، باشقا میللی فعاللارلا بیر آرایا گله رک ، متدلاریندا بیر آزجا ده ییشیک لیک ائدیرلر. سئچگی ده آکتیو اولماق اساس هدفه چئوریلیر و اعلمی بو جریان دا یالنیز موضوعلاردان بیری کیمی اولور. یعنی، دوستلاریمیزین تارتیشمالاری و پیلانلاری اعلمی محورلیک دن چیخیر. آنجاق مسئله نین بیر طرفی یئرینده قالیر-اعلمی نین سئچگی یه  قاتیلماق ایسته مه سی و میللی حرکتین بو حاقدا قرار وئرمه سی-. دوستلاردان آلدیغیمیز معلوماتا گؤره ، اعلمی میللی حرکتین اوزرینده حساب ائدیرمیش. اگر حرکت اوندان حمایت ائتسه سئچگی یه قاتیلاجاقمیش. سونرالار بو ایدیعانین دوغرو اولمادیغی اورتایا چیخیر. اعلمی ، واسطه ساندیغی میللتچی لردن جاواب آلمادیقدا، اؤزو اویونا گیریر. حرکتین ایچینده یارادیلمیش مصنوعی و موقتی آیریلیقدان ایستیفاده ائدیب ، هامی نی اوندان حمایت ائتمه یه تحریک ائتمه یه چالیشیر. شایعه لر ائله یاییلیر کی ، موختلیف گروهلار اعلمی ایله گؤروشمه یه رقابته کئچسینلر. اعلمی بو ایشدن نتیجه آلماسادا ، ایسفند آیی نین 19 رسمی اولاراق آدای لیغینی اعلان ائده جه یینی دئییر. گؤرونو کی ، اعلمی حرکتین قرارین گؤزله میرمیش.بو ساده جه اونون ایستیفاده ائتدییی تاکتیک لردن بیری ایمیش. سون شانسی نی یوخلاماق اوچون میللتچی لری گؤروشه چاغیریر. بو گؤروشلر نه قدر پیلانلاشمیش اولسادا سناریونون ایلک آنلاریندا ، آرخا پرده آچیلیر. پرده نین اؤنون ده کی آرتیستین گرچک اوزو گؤرونور. اؤرتوک اوزوندن دوشور و نئجه دئیرلر اووجو آچیلیر. اعلمی نین دوزوب قوشدوغو صحنه بیرآندا ده ییشیر.  او اصیل اوزونو ایسته مه دن گؤستریر. دانیشیغین ایچینده گئدن بیر سیرا سؤزلر و اونون حرکتلرینی یازماقلا ، عزیز اوخوجولار اونون کیم اولدوغون بیر داها تانییاجاقلار، دوشونورم.

اعلمی اؤنجه سئچگی یه قاتیلماق اوچون انگیزه سیندن دانیشیر. مجلس و پرزیدنت سئچگی لرینه قاتیلماقدا تحول یاراتماق و اوز هدفلرینه چاتماغی دئییر. سوروشاندا کی ، سیزین ایسته دیینیز تحول ندیر و هانسی هدفلره چاتماق ایسته ییرسیز؟ اعلمی یئریندن داشلاناراق : سیز منی موحاکیمه ائدیرسیز؟! سیز منی مواخیذه ائدیرسیز؟!بونا حاققیز  یوخدور.

-         بیز هدفلریز و پیلانلاریزلا تانیش اولماق ایسته ییریک

اعلمی : سیز گرک ایندییه جن منی تانییاردیز. من 8 ایل ده ...  ایشلری گؤرموشم. بونلار تحول دئییل ندیر بس؟ ...دفعه وزیر ایستیضاح ائتمیشم، ... دفعه طرح قالدیرمیشام، ... 15 –جی اصلی موغانین نوماینده سی الی ایله قالدیرمیشام، ... بابک قالاسینا گئتمیشم، خرداد حادثه سینده مجلس ده شهریارین او شعرین اوخوموشام و....

-         بونلار سیزین وظیفه لرینیزدیر ، گرک گؤریدیز.

اعلمی یئنه سسین اوجالداراق : من بونلاری بو میللته لوطف ائله میشم، وظیفه م دئییل. وظیفه اولسایدی باشقا نوماینده لر ده گؤرردی.

-         باشقا نوماینده لر گؤرمه ییبسه سیزدن و ظیفه دوشمور.هله چوخ ایشلر ده وار کی گؤرمه ییبسیز.

اعلمی قولون طرفه اوزادیب ، بارماغین گؤی ده فیرلایاراق: آغا سیزین رأییز منه لازیم دئییل دور گئت ائشییه!

-         سیزین بیر پرزیدنت آدایی اولاراق داورانیشیز بودور؟

اعلمی : هه. منیم بو میللته احتیاجیم یوخدور، میللتین منه احتیاجی وار.

-         سیزین بیر پرزیدنت آدایی اولاراق ان آزی سوال ائشیتمه یه ظرفیتیز اولمالی دیر.

اعلمی : یوخ منیم ظرفیتیم یوخدور.

اعلمی نین آداملاریندان بیری آرایا گیریر و فضانی ساکیت لشدیرمه یه چالیشیر. اعلمی او آندا باشا دوشمه سه ده اونون اورداکی آدامی گؤرور کی ایش کؤرلاندی. اعلمی ایسه اویونو ادوزموش گؤروب ، "گلین صمیمی دانیشاق ، پرزیدنت لیی قویون قیراغا"دئییر.

باشقا بیر میللتچی دانیشیر: دئییرسیز صمیمی دانیشاق. البته منه ده ائشییه چیخ دئمه سز، بیر نئچه سؤزوم وار.

اعلمی : بویورون، آنجاق دانیشاندا قاباغیزداکی آدامین کیم اولدوغون نظرده آلین!

-         یولداشیمیز دئمیشکن سیز میللته لوطف ائله میبسیز ، وظیفه زی گؤروبسوز. چوخ ایشلر وار کی گرک گؤریدیز گؤرمه ییبسیز. گؤردویوز ایشلریزین چوخوندا دا سوال یئری وار. من اؤزوم نئچه دفعه اؤیرنجی لرین تعلیق حوکملری حاقدا سیزه زنگ ائتمیشم . دئییبسیز یاز گؤندر تهرانا. اؤیرنجی لریمیز ستاره دار اولوبلار، زنگ ائتمیشم . دئییبسیز قویون اعلمی بیر آزدا اؤز دردینه قالسین، میللتین دردین چوخ چکیب. آنجاق نئچه گون سونرا شیراز اؤیرنجی لریندن حمایت ائدیبسیز. دانیشگاهدا دانیشدیغیز زامان ، من میللی مسئله لر حاقدا سوال وئردیم، منه جاواب وئرمک یئرینه ، "برو بیرون بسیجی مزدور" دئدیز.

اعلمی سؤزون آراسینا گیریر و "خب، اوردا بیری گلیر خرداد حادثه سینین میلادی تاریخینی دئییر و او حاقدا مندن سوال ائدیر... "

باشقا بیر میللتچی سوال وئریر: سیز سئچگیلر زامانی تبلیغاتیزدا میللی مسئله یه و آذربایجانین ایستکلرینه نه قدر یئر وئره جکسیز؟

اعلمی : دئدیم کی، من ایران میللتینه پرزیدنت اولماق ایسته ییرم . سیز ده گرک مندن ایسته یه سیز کی آذربایجان محورلی دانیشمایام. البته منیم انتخابات شمیم وار من بونو کئچمیش ده گؤسترمیشم. بیله رم هانسی فضادا نئجه دانیشام. هر گروهون ایسته یین راحاتجا تشخیص وئریب، دانیشابیله رم.

اعلمی بونو دوز دئییر. ایلک دؤنه سئچگی یه قاتیلدیغی زامان تبریزده رفسنجانی یه قارشی دانیشماقلا سس قازاندی. ایندی ایسه پرزیدنت سئچگی لرینده همین تاکتیک دن ایستیفاده ائتمک ایسته ییر.

گؤروندویو کیمی، اعلمی نین بو سئچگی لرده قاتیلماسی میللی حرکته هئچ بیر قازانجی یوخدور. او دئییر کی ،" سیز گرک چوخ یاخشی، یاخشی ، پیس و چوخ پیس آراسیندا بیرین سئچه سیز. منطیق بونو دئییر کی هرکس اؤز خانواده سیندن اولانی سئچر".

 بئله لیکله اونون حاققیندا مثبت دوشونن یولداشلاریمیزین الی بوشا چیخیر.بورادا بیر نئچه سوال اورتایا چیخیر:

اعلمی نین سئچگی یه قاتیلماسی ایله کیم قازانیر؟

اعلمی اؤزونو دوشونور یوخسا بیر اؤرگوتون گؤرولی سی دیر؟

8 ایل "امنیت ملی وسیاست خارجی " کمیسونون عضوو اولان اعلمی نین صلاحیتی ندن رد اولور؟

میللی گوونلیک کمیسیونونون عضوو اولان اعلمی ، میللی حرکتی یاتیردماقدا و جایدیرماقدا نه قدر رول اویناییر؟

احمدی نژادی ، کروبی نی ، خاتمی نی و ... لاغا قویماقلا ، مسخره یه توتماقلا آذربایجانین هانسی دردی درمان اولاجاق؟

اعلمی نین سئچگی یه قاتیلماسیندا ایکی فرضیه وار :

1-   اعلمی شهرت طلب و قدرت طلب بیریسی دیر و بو آرادا اؤزون دوشونور. او سیستمین ایچینده اولسادا اؤز موقعیتیندن راضی دئییل. سئچگی ده پوپولیستی سیاستله و های کوی سالماقلا اؤزونه ایمتیاز آلماق ایسته ییر.

2-   اعلمی ایران حاکمیتینده ایقتیداردا اولان قانادین آدامی دیر. حاکمیت بو دؤنه رادیکال اصولگرالاری یئنی دن ایش اؤسته گتیرمک ایسته ییر. اعلمی ایسه باشلیجا اصلاحاتچی لارین الده ائده جه یی سسی داغیتماق اؤچون سئچگی یه قاتیلیر.

بو ایکی فرضیه نین هانسی نین دوز اولماسی بیر یانا ،بو آرادا ان چوخ ضربه آلان میللی حرکت اولاجاق. میللی حرکت ، آذربایجان میللتین میللت تانیمایان آرتیسته الدانیرسا بونون سوروملوسو بیز اولاجاییق. اونا گؤره ده هرکس اؤز نووبه سینده بو مسئله ایله باغلی آچیقلاما وئرمه لی دیر.